⇐विषय सूचीमा फर्कन

 पाठ ३.८.१

मृत्युपछिको सम्पर्क (Contact after death)

                      मानव शरीरको मृत्यु भएको भनेर हस्पिटलमा विज्ञानका विभिन्न साधन र विधिद्वारा प्रमाणित गरेपछि, मृत्युको आवश्यक प्रमाणपत्र कानुनी रुपमा बनाएर दिएपछि, मृत शरीरलाई आफ्नो संस्कार अनुसार जलाएर वा कसैलाई गाडेर आएपछि पनि ती मरिसकेकाहरू पुनः सम्पर्कमा आउन सक्दछन् । त्यो सम्पर्क कुनै भ्रम नभएर वास्तविक हुन्छन् । ती मरिसकेकाहरुले वास्तविक परिस्थिति, वर्तमान समयका कुरा गर्न सक्दछन् । उनीहरुको मृत्युभन्दा धेरै पछिका घटनाका कुराहरु गर्दछन् । मृत्यु पछिका नाताहरु, परिवारका नयाँ सदस्यहरुलाई जस्तै नयाँ बुहारी, ज्वाइँ, नातिनातिनीहरुलाई चिन्दछन् । परिवारका सदस्यले गरेको नयाँ कारोवारका बारेमा चिन्दछन् वा उनीहरुले थाहा पाइसकेका हुन्छन् । परिवारका सदस्यहरूका बिचमा कुनै मनमुटाब, झै झगडा त झन् उनीहरूलाई स्पष्ठ थाहा हुँदो रहेछ । यस्ता घटनाका थुप्रै प्रमाणहरु छन् । यस्ता सम्पर्कका अनुभव समाजमा सबैले देख्ने वा अनुभव गर्न नसके पनि कोहीकोही देख्नेहरु, अनुभव गर्नेहरु पनि सही विश्लेषणको अभावमा चुप रहन वाध्य भएका रहेछन् । मेरो यस विषयमा भएको खोजिको क्रममा विभिन्न मानिसहरूसँग भेटघाट कुराकानी गरी यस्ता अनुभव गरेका मानिसहरूको अनुभव बटुल्नु थियो । पत्याउदैनन् भनेर यसो बिस्तार बिस्तारै कुरा कोट्याउनु पर्छ एक छिन पछि यस्तो अनुभव त हामीले सँधै गरिराखेका छौँ भन्दथे थुप्रै मानिसहरूले । खास गरेर नेपाल, भारत जस्ता मुलुकका मानिसहरूमा यस्तो अनुभवहरु प्रशस्त रहेछन् । समाजमा घर घरमा, गाउँ, शहर, देश सबै स्तरमा देवी देवता, पितृ, भुत, प्रेत, बोक्सीका कुरा र चर्चा गर्ने चलन छन् । त्यसका लागि विभिन्न विधि र संस्कारहरु गर्ने चलन छन् । तर त्यसको सही परिभाषा दिन कोही तत्पर छैनन् । किनकि कसैसँग पनि प्रयाप्त जानकारी छैन ।
                      हामी लेखकहरूमा विज्ञानको ज्ञान, चिकित्साशास्त्रको उच्च शिक्षाको ज्ञान, एक चिकित्सक भएर विभिन्न ठाउँहरुमा काम र सेवाहरु पुर्याइ सकेको अनुभव, समाज र आफ्नो शिक्षा प्रतिको जिम्मेवारी बुझेर आफुले बोलेको लेखेको कुराहरू प्रतिबद्धताको, जिम्मेवारीको र त्यसबाट आइपर्ने सबै दोष, आक्रोष, परिणामहरुको सबै मुल्य थाहा पाएर सबैका सामु यस किताब मार्फत भन्न गइरहेका छौँ कि हामी सबैले देख्ने गरेको मृत्यु पूर्ण मृत्यु होइन । ती समस्त मरिसकेकाहरु कुनै अवस्थामा जीवित छन् । हामीले देख्ने गरेको मृत्यु त मानिसको लागि एक ठुलो दुर्घटना मात्र भएको रहेछ जीवनमा । त्यस दुर्घटनाका दिनदेखि उसको सबै अधिकारहरू हनन् भएछन्, सबै आफन्तहरू टाढा भएछन्, आफुले जोडेको सम्पत्तिहरू अर्काले खान थालेछन् । जस्तैः आफु त सानो कामले बाहिर गएको बाहिरबाट फर्केर आउदा घरमा उसका लागि सबै ढोका बन्द भएछन् जस्तो भएको रहेछ यो मृत्यु त । हामीले देख्ने मृत्यु त त्यस अज्ञात मृत्युको शिकार हुनुपर्दा परेको आपदमा गुहार माग्न खोज्दा आफन्तहरूबाट आवश्यक गुहार नपाएको, धोका पाएको दिनको सुरूवात रहेछ । तिनीहरु मानिससँग सम्पर्कमा आउन खोज्छन्, कति आइरहेका छन् र लेखकसँग यो तथ्यको प्रमाणहरू छन् । ती मरिसकेको मान्छेहरुका लिँग शरीरहरूको मानव जातीसँग विभिन्न किसिमको सम्पर्कहरु भइरहेका रहेछन् । त्यस्ता खालका सम्पर्कका कारण मानव जातीको जीवनमा कतिपय राम्रा प्रभाव परेका छन् भने कतिपय नराम्रा असरहरु परेका रहेछन् । यस्ता सम्पर्कहरूले मानव जीवनको सबै स्तर पारिवारिक, सामाजीक, आर्थिकका साथ साथै मानिसको स्वास्थमा पनि ठुलो असर पार्ने गरेको रहेछन् । ती अदृश्य चिजहरुसँगको अन्जानमा हुने गरेको सम्पर्कको कारण मानिसमा विभिन्न रोग र लक्षणहरु देखिने र बेलैमा उपचार र गुहार नपाएकाहरु मृत्युलाई अगाल्नु परेको रहेछन् । कहिले कहिले यस्तै कारणहरूले गर्दा हामी डाक्टरहरुले हस्पिटलमा वा क्लिनिकमा पुर्याउन खोजेको सेवा र उपचारको उचित फल बिरामीले नपाएको हुन सक्दछन् । हामी आफै चिकित्सकहरू भएको भएर यस्ता अदृश्य चिजको प्रभाव मानव जातीमा स्वास्थमा हानी पुर्याइरहेको लक्षण र प्रमाणहरु देख्न सफल भयौँ । यस कुरालाई जनमानसमा ल्याएर सार्वजनिक गर्नुभन्दा अगाडि हामी आफैले अझै गहिरिएर अध्ययन र अनुभव र जाँचहरु गयौँ । यी अध्ययनका बखतमा जम्मा हुन आएका अनुभवहरु कतिपय उपचारका उपायहरु हुन गएका छन् । ती उपायहरुले धेरै मानिसहरुमा उपचार र स्वस्थ हुन पुगेका अनुभव बटुलेका छौँ । ती कतिपय उदाहरणहरु पछिका पाठहरुमा उल्लेख गर्ने छौँ । यो कुराहरू रुढिवादी मात्र नभएर प्रमाण सहितको समस्या हो । त्यसैले समस्त आधुनिक विज्ञान, वैज्ञानिकहरु, डाक्टरहरू सँयुक्त रुपमा मिलेर वैज्ञानिक टुङ्गो लगाउनु पर्ने जरुरी देखेका छौँ । अचानक यसरी अदृश्य शरीर छ, मृत्यु भइ सकेको र डाक्टरले मृत्युको सर्टिफिकेटमा सही गरिसकेको भनेकाहरु अझै जीवित छन्, तिनीहरुसँग सम्पर्कमा आउन सकिन्छ, तिनीहरुको मृत्यु अघि र मृत्युपछिका सन्दर्भका कुराहरु गर्न सकिन्छ भन्ने कुराको प्रत्यक्ष प्रमाणहरु पेश गर्न लेखकहरू तयार छौँ । लेखकहरूले आफ्नो अध्ययन र खोजीको क्रममा पटक पटक यस्ता अनुभवहरु बटुलेको छौँ । ती लिँग शरीरहरुले गर्ने कुराहरुको विश्लेषण, प्रकार, कारणहरुको लेखाजोखा गरीसकेको छौँ । ती मरिसकेकाहरुसँग सम्पर्क भएको बेलामा तिनीहरु अर्ध चेतनामा रहेका थिए, तर परिवारका खबरहरु पाएका थिए, उनिहरूका आफ्ना इच्छाहरु अझै रहिरहेका थिए, उनिहरूलाई पानीको प्यास लागीरहेको थियो, खानाको इच्छा र भोक लागिरहेको थियो, जाडोको अनुभव गरिरहेका थिए, अँध्यारोको डर भइरहेको थियो, आफ्ना, आफन्तहरूलाई चिन्दथे, कतिपय खबरहरु तिनलाई जीवित अवस्थामा थाहा नभएका खबरहरु पनि थाहा भएको थियो ।

                हामी आफैले आफ्ना पितृहरूसँग भेट्न सफल भयौँ  भनेर अन्य पाठहरूमा वर्णन गरिसकेका छौँ । यिनै ज्ञानहरू अन्य आवश्यक मानिसहरूलाई व्यक्त गर्दा अन्य मानिसहरूले पनि आफ्ना पितृहरूसँग भेटेर कुरा गर्न सफल भए । हुन त यो सम्पर्कको अवस्था एक अस्वस्थ अवस्था जस्तो थियो । तर पनि वास्तविकतालाई बुझ्न हिम्मत राख्नेहरूले यो कार्य गर्न सफल भए । यो एक कठिन कार्य हो । कोहीकोही व्यक्तिमा यो पितृहरूसँग सम्पर्क गर्न सक्ने क्षमता अगाडि देखिनै खुलि सकेको अवस्था थियो । म पितृहरूसँग कुरा गर्छु भन्ने मानिसहरू थुप्रै भेटिए । तर त्यस्ता क्षमता भएका मानिसहरू अझै अस्वस्थ अवस्थामा थिए र डाक्टर, लामा, झाँक्री, हेराउने कहाँ पुगेर गुहार माग्दै रहेछन् । अझ कति बिरामीहरू आफ्नो अस्वस्थ क्षमताको सदुपयोग गरेर हेराउने काम गर्दै गरेको देखियो । 

                  विज्ञानको क्षेत्रमा र चिकित्साशास्त्रका क्षेत्रमा काम गर्ने अन्य सहकर्मीहरूमा मानिसहरूको यो समस्या देख्न सक्ने ज्ञान किन आएन हामीले बुझ्न सकेनौँ । वास्तवमा यस्ता अनुभवहरू गरेर अस्वस्थ भइरहेका बिरामीहरू थुप्रै रहेछन् । ती बिरामीहरू आफ्ना समस्याहरू लिएर उपचारको लागि डाक्टर कहाँ पुगेका थिए । तर  विज्ञानको क्षेत्रमा र चिकित्साशास्त्रका डाक्टरहरू अन्य सम्बन्धित सहकर्मीहरू द्वारा  बिरामीको सही अवस्था बुझन सकिएको छैन रहेछ । कतिपय बिरामीहरू पितृ, भुत, प्रेतहरूसँग सम्पर्क भएर बिरामी भएकाहरू रहेछन् । डाक्टरहरूले  त्यस्ता बिरामीहरूको अवस्थामा निदाउने औषधी दिन हतारिनु भन्दा त्यस बिरामीले भनेका कुराहरू गहिरिएर सुनेर ती कुराहरूमा केही सत्यता छन् कि भनेर सोच्न आवश्यक छ ।

पितृहरूसँग सम्पर्क भएर अस्वस्थ भएका बिरामीहरूको उपचारका क्रममा पितृसँग भएका सम्पर्क र कुराकानीका प्रत्यक्ष सचित्र (भिडियो)हरु यस साइटमा लेखहरूमा हेर्न सकिन्छ ।    

⇐विषय सूचीमा फर्कन

This post is also available in: English